ئاوينه نيوز - جيهان سات: سه‌رۆكی‌ لیژنه‌كانی‌ قایمقامیه‌تی‌ سلێمانی‌ عوسمان ئه‌بو به‌كر، ئه‌مرۆ چوارشه‌مه‌، له‌لێدوانێكیدا به‌ئاوێنه‌نیوز راگه‌یاند "به‌هۆی‌ نه‌بونی‌ مه‌رجی‌ ته‌ندروستیه‌وه‌، بڕیاری‌ داخستنی‌ هه‌ردوو كه‌بابخانه‌ی‌ وه‌لی‌‌و قادرمان ده‌ركرد".
ناوبراو ئاشكرایكرد "لیژنه‌ی‌ قائیقامیه‌ت نمونه‌ی‌ گۆشتیان وه‌رگرتوه‌‌و له‌تاقیگه‌ی‌ فیته‌رنه‌ری‌ ده‌رنه‌چوه‌‌و ره‌نگه‌كه‌ی‌ نائاسایی‌ بوه‌"، ئه‌مه‌ جگه‌ له‌وه‌ی‌ له‌پشكنینی‌ به‌كتریلۆجیدا ده‌ركه‌وتوه‌ "گۆشته‌كه‌ شیاوی‌ خواردن نییه‌".
به‌پێی‌ بڕیاره‌كه‌ی‌ قائیقامیه‌ت، هه‌ردو كه‌بابخانه‌ بۆ ماوه‌ی‌ پێنج رۆژ داده‌خرێن‌و ئه‌گه‌ر هات‌و ئه‌م كاره‌ دوباره‌ بوه‌وه‌، روبه‌ڕوی‌ دادگا ده‌كرێنه‌وه‌.